Дунейм щыхъыбархэр

Нобэ

♦Кърым Республикэм и махуэщ. 1991 гъэм а щIыналъэм референдум щекIуэкIащ Кърымым и автономиер зэфIэгъэувэжыным теухуауэ. Абы кърикIуам ипкъ иткIэ Украинэм и Совет Нэхъыщхьэм 1991 гъэм мазаем и 12-м «Кърым Автономнэ Совет Социалист Республикэр къызэгъэпэщыжыным и IуэхукIэ» унафэр къищтауэ щытащ.
♦Азербайджаным ягу къыщагъэкIыж 1990 гъэм республикэм къыщыхъуа зэпэщIэтыныгъэ гуащIэм хэкIуэдахэр. Политикэ оппозицэм и Iуэху еплъыкIэр хуамыдэу Баку советыдзэхэр дашащ икIи Iэщэ къагъэсэбэпащ. Абы щыгъуэ цIыхуи 170-рэ хэкIуэдащ, цIыху 400-м щIигъу уIэгъэ хъуауэ щытащ.
♦1588 гъэм Урыс пащтыхь Федор Иван и къуэм Кремлым щригъэблэгъат Черкасскэхэ Темрыкъуэ и къуэ Мамсрыкъуэрэ Къамболэт и къуэ Къудэнэтрэ (зэкъуэш бынхэт).
♦1831 гъэм Бельгиер зэи зы къэралми и Iуэху хэмыIэбэным теухуа унафэ къащтащ.
♦1921 гъэм Бгырыс АССР-р къэунэхуащ.
♦1921 гъэм Дагъыстэн автономнэ республикэр къызэрагъэпэщащ.
♦1925 гъэм СССР-мрэ Япониемрэ дипломатие зэхущытыкIэ яку дэлъыным теухуа унафэм Пекин Iэ щыщIадзащ.
♦1944 гъэм Великий Новгород къалэр нэмыцэ-фашист зэрыпхъуакIуэхэм къыIэщIагъэкIыжащ. Ар бийм иIыгъащ махуэ 883-кIэ.
♦1958 гъэм автомобилым иIыгъ хуабжьагъыр къэзыгъэлъагъуэ япэ радархэр Лондон щагъэувауэ щытащ.
♦1920 гъэм къалъхуащ Италием щыщ кинорежиссёр, США-м я «Оскар» саугъэтыр тхуэнейрэ зыхуагъэфэща Феллини Федерикэ.
♦1932 гъэм къалъхуащ ветеранхэм я республикэ Советым щIалэгъуалэм ядэлэжьэнымкIэ и комиссэм и унафэщIу лэжьа, УФ-м и Журналистхэмрэ ТхакIуэхэмрэ я зэгухьэныгъэхэм хэт, КъБР-м и ЩIыхь тхылъыр зыхуагъэфэща Пщыбий СулътIан.
♦1936 гъэм къалъхуащ Адыгэ Республикэм щIыхь зиIэ и журналист НапщIэкъуий Заур.
♦1937 гъэм къалъхуащ совет, урысей политик, Тэтэрстаным и япэ президенту щыта Шаймиев Минтимер.
♦1939 гъэм къалъхуащ мэкъумэш щIэныгъэхэм я доктор, КъБКъМУ-м и профессор Елмэс Албий.
♦1952 гъэм къалъхуащ урысей актёр, режиссёр, фильм куэдым я сценарийхэр зытха, УФ-м и цIыхубэ артист Хотиненкэ Владимир.
♦1952 гъэм къалъхуащ уэрэджыIакIуэ, УФ-м и цIыхубэ артисткэ Аллегровэ Иринэ.
♦1959 гъэм къалъхуащ философие щIэныгъэхэм я доктор, КъБКъУ-м и профессор КъуэщIысокъуэ Роберт.
♦1975 гъэм къалъхуащ дуней псом самбо бэнэкIэмкIэ тIэунейрэ и чемпион Алъхъо Сыхьэтбий.

Дунейм и щытыкIэнур

   «pogoda.yandex.ru» сайтым зэритымкIэ, Налшык уфауэ щыщытынущ, пIалъэ-пIалъэкIэрэ уэс къыщесынущ. ЩIыIэр махуэм градуси 7 - 4, жэщым градуси 9 - 8 щыхъунущ.

Лъэпкъ Iущыгъэ:

Бжьэ зезыхуэр хум елэжьым и Iыхьэгъущ.