Коми Республикэм и махуэхэр - Къэбэрдей-Балъкъэрым

Хабзэ зэрыхъуауэ, нэгъуэщI лъэпкъхэм я щэнхабзэм и махуэхэр ди щIыналъэм щагъэлъапIэ, хэгъэгухэм яку дэлъ зэпыщIэныгъэхэр нэхъри ирагъэбыдэу. А Iуэху дахэм къыпызыщэу иджыблагъэ Къэбэрдей-Балъкъэрым щекIуэкIащ Комим и щэнхабзэм и махуэхэр. Ар къызэрагъэпэщащ 2021 гъэм а республикэр илъэси 100 зэрырикъум и щIыхькIэ. Зэхыхьэр ирагъэкIуэкIащ УФ-м ЩэнхабзэмкIэ и министерствэр и дэIэпыкъуэгъуу, «Мы -  Россия» федеральнэ программэм хыхьэу.

КъБР-м щэнхабзэмкIэ и министрым и къуэдзэ Карчаевэ Iэминат зэхыхьэ гуапэр къыщызэIуихым къыхигъэщащ Коми Республикэм илъэс куэд хъуауэ ди щIыпIэм пыщIэныгъэ ин зэрыхуиIэр, дызэрыгушхуэ «Кабардинка» къэрал академическэ ансамбль цIэрыIуэм мызэ-мытIэу абы зэрызыкъыщигъэлъэгъуар. Апхуэдэу и псалъэм щIигъужащ Комим уэрэдымрэ къафэмкIэ и «Асъя кыа» («Пщэдджыжь вагъуэ») къэрал ансамблым концерт гукъинэж Налшык зэрыщитар.
- Комим и щэнхабзэм и махуэхэр Урысей Федерацэм и щIыпIэ 37-м щрагъэкIуэкIыну яубзыхуащ. Iыхьэлейуэ гуапэ сщохъу ди щIыналъэм и махуэхэр Къэбэрдей-Балъкъэрым зэрыщедгъажьэр. Налшык икIыу ди артистхэр Владикавказ, иужькIэ Грознэм, Мэхъэчкъалэ кIуэнухэщ, - жиIащ Коми Республикэм щэнхабзэмкIэ, туризмымрэ дэфтэр IуэхухэмкIэ и министр Емельянов Сергей.
Ди республикэм и хъыбарегъащIэ IэнатIэхэм я журналистхэм я упщIэхэм жэуап иратащ Емельянов Сергей, УФ-м щIыхь зиIэ и артист, «Асъя кыа» ансамблым и художественнэ унафэщI Бушуев Дмитрий, Коми Республикэм и филармонием и Iэтащхьэ Балмастовэ Марие.