Гъуэгум щысакъын зэрыхуейр аргуэру ягу къагъэкIыж

Iуащхьэмахуэ щIыналъэм и автоинспекторхэмрэ жылагъуэ лэ­жьа­кIуэхэмрэ иджыблагъэ ирагъэкIуэкIащ гъуэгум зэрыщызекIуапхъэ мардэхэм цIыхухэр зэрытетыр къэпщытэным, хабзэхэр уэим пщIы зэры­мы­хъунум абыхэм иджы­ри зэ гу лъегъэ­тэ­ным теухуа Iуэху. Нэхъыбэу абы къыхашар рулым дэс цIыхубзхэрщ.

Я унагъуэхэм, сабийхэм узыншэу, бэIу­тIэIун­шэу яхыхьэжынымкIэ гъуэ­гум щысакъыным мыхьэнэ къызэрымыкIуэ зэриIэр ягу къагъэкIы-жащ абыхэм. Акцэр къы­зэ­рагъэпэщащ Урысей МВД-м Iуащхьэмахуэ ­щIы­налъэм щиIэ къудамэмрэ а IуэхущIапIэм епхауэ лажьэ жылагъуэ советым хэт Газаевэ Зух­рарэ.
Автомобиль зезыгъа­кIуэ цIыхубзхэм а махуэм иджыри зэ кърагъэпщы­тэжащ бжьыхьэ-щIымахуэ лъэхъэнэм гъуэгум щызекIуэным пыщIа хабзэхэр, сабийхэр къешэ­кIы­ным хуэунэтIауэ абы­хэм къыщыгъэлъэ­гъуахэр. Лъэ­су къэзы­кIухь­хэри гулъытэншэу къагъэнакъым - автомобиль щызекIуэ   гъуэгур    шы­нагъуэн­шэу зэ­пыуп­щIыным теу­хуа тхылъ цIы­кIухэр хуа­гуэшащ абыхэми.
ЦIыхубзхэр я гуапэу хэтащ Iуэхум - инспекторхэм я чэнджэщхэм щIэдэIуащ икIи гъуэгу хабзэхэр къы­зэпамыудыну, я бынхэм абы и лъэныкъуэкIи ­щап­хъэ дахэ ирагъэлъагъуну къагъэгугъащ.