Къэхъуар зи лъабжьэ

«Russiа Todаy» телеканалымрэ «Sputnik» дунейпсо хъыбарегъащIэ IуэхущIапIэмрэ я редактор нэхъыщхьэ Симоньян Маргаритэрэ журналист Рогаткин Александррэ трахащ «Беслан» документальнэ фильмыр. Абы лъабжьэ хуэхъуащ Осетие Ищхъэрэ - Алание республикэм хыхьэ Беслъэн къалэм дэт курыт еджапIэ №1-м 2004 гъэм фокIадэм и 1-м къыщыхъуа гузэвэгъуэр.

Урысей Федерацэм фокIадэм и 3-р Террорым пэщIэтыным и махуэу щагъэуващ икIи илъэс къэс ягу къагъэкIыж терракт нэхъ гущIэгъуншэхэм ящыщу тхыдэм къыхэна Беслъэн къалэм дэт школым къыщыхъуа гузэвэгъуэм хэкIуэдахэр. Абы ирихьэлIэу утыку кърахьащ цIыху 330-рэ зыхэкIуэда (186-р сабийщ), цIыху 800 уIэгъэ щыхъуа террактым траухуа «Беслан» фильмыр. Абы хэтщ а махуэр зи нэгу щIэкIа цIыху 40-м щIигъу, террористхэм яубыдахэри къызэ­щIиубы- дэу. Апхуэдэу фильмым къыщагъэпсэлъащ щIэпхъаджащIэхэм  ящыщу псэууэ къэна Кулаев Нурпаши. Абы къуаншэу зы­къилъытэжыркъым, къыхуащIа унафэр игъэзэщIауэ аращи.
2004 гъэм и гъэ еджэгъуэщIэм и пэ махуэм дуней псом щызэлъащIыса террактыр зи нэгу щIэкIа Симоньян Маргаритэ, лъыкIэ гъэнщIа а махуэ шынагъуэм лъандэрэ илъэс 16 дэкIыжами, къэралым и тхыдэ напэкIуэцIхэм я нэхъ гуузхэм ящыщ хъуа а къэхъугъэр пэжу къигъэлъэгъуэжыным хущIэкъуащ. Беслъэн къалэм щыIа террактым радиомрэ телевиденэмкIэ къэралыр кIэлъыплъырт. А къэхъугъэ шынагъуэм теухуа хъыбархэр зы сыхьэт нэхъ дэмыкIыу «Россия 1» телеканалым и эфир занщIэмкIэ къитат Симоньяным, яубыда школым щекIуэкI залымыгъэм теухуа хъыбар гухэщIхэр къэралым и мызакъуэу дуней псом зэрыщызэлъищIысыным иужь иту. ЩIэпхъаджагъэм, мыхъумыщIагъэм, залымыгъэм я бий «Беслан» фильмыр яхуэгъэзащ цIыху псоми.
- А гузэвэгъуэм зи сабий хэхуа адэ-анэхэм шыIэныгъэ, къару къызэрымыкIуэ зэрахэлъыр ядэслъэгъуащ. Осетинхэр хьэщIэ фIыуэ зылъагъу цIыху гуапэхэщ, пщIэ, нэмыс зыхэлъ лъэпкъщ, - жиIащ Симоньян Маргаритэ. – Гуапэщ Осетие Ищхъэрэм и теплъэм зэхъуэкIыныгъэфIхэр зэригъуэтар, иджырей къалэхэм къакIэрымыхуу.
Осетие Ищхъэрэ - Алание республикэм и Iэтащхьэ Битаров Вячеслав жиIащ Беслъэн къалэм и школым балигъхэми сабийхэми а махуэм щагъэлъэгъуа лIыгъэм щIэблэр щIэпIыкIын зэрыхуейр. Абы Симоньян Маргаритэрэ и гупымрэ фIыщIэ яхуищIащ икIи фильмыр трахынымкIэ дэIэпыкъуэгъу яхуэхъуащ.
Беслъэн къалэм къыщыхъуа террактым теухуа фильм зыбжанэ нэхъапэIуэкIи трахащ. Апхуэдэхэщ «Школа номер один», «Город маленьких ангелов», «Беслан. Жизнь за ангелов», «Беслан. Помни», «Беслан. День незнаний», «Надежда», «Письма террористу» документальнэ фильмхэр, нэгъуэщIхэри.