122 номерым лэжьэн щIедзэ
Урысейм лэжьэн щыщIидзащ COVID-19-м теухуа упщIэхэр зиIэхэм жэуап щратыну телефон номерым. УФ-м и Вице-премьер Чернышенкэ Дмитрий щIыналъэхэм я Iэтащхьэхэм щэкIуэгъуэм и 27-м щаIущIам абыкIэ хъыбар яригъэщIащ.
«122 номерым Iэмал къитынущ узыфэм теухуауэ щIыналъэхэм щыIэ упщIэ псори зэгъэуIунымкIэ - узыфэр зэуэлIам щыкIэлъыплъын хуейр поликлиникэрами е сымаджэщым ягъэгъуэлъынуми гъэбелджылыным хуэгъэза Iуэхухэри и чэзум зэкIэлъагъэкIуэфынущ абы и фIыгъэкIэ», - жиIащ УФ-м и Правительствэм и УнафэщIым и къуэдзэм.
122 бжыгъэр къащтэрэ цIыхухэр псалъэмэ, щIэуэ къежьа узыфэщIэм теухуауэ зыгъэпIейтей Iуэхухэр абы щызэхагъэкI хъунущ - узыфэм ехьэлIауэ теухуауэ щIыналъэм щыIэ щытыкIэр зыхуэдэри къъыжраIэнущ, чэнджэщхэри къыщратыфынущ, хуей хъумэ - поликлиникэм, «ДэIэпыкъуэгъу псынщIэм», нэгъуэщI зыхуэфащэ IэнатIэхэми псынщIэу пащIэфынущ.
ИджыпстукIэ а IуэхущIапIэхэм мыпсэлъэфу цIыхухэр дакъикъэ тIощIкIи, нэхъыбэкIи щыпэплъэ щыIэщ. Чернышенкэ къызэрыхигъэщамкIэ, «ДэIэпыкъуэгъу псынщIэм» телефонкIэ зыпамыщIэфу нэхъыбэрэ гугъуехь хэтхэщ Дагъыстэным, Хакасием, Воронежскэ, Иркутскэ, Новосибирскэ, Омскэ областхэм, Забайкальем, Алтай Республикэм, Алтайскэ, Хабаровскэ крайхэм щыпсэухэр.
Колл-центрхэм лэжьэн щIадзэмэ, щытыкIэр хэпщIыкIыу зэрефIэкIуэнум шэч къытрахьэркъым ахэр зэтезыухуэхэм. Псалъэм папщIэ, сымаджэхэм зыхуэфащэ IэнатIэхэм зыпащIэным трагъэкIуадэ зэманыр хэпщIыкIыу нэхъ мащIэ щыхъуащ Иркутскэ, Омск, Томскэ областхэм, Алтайскэ крайм, къэралым и нэгъуэщI щIыналъэ 27-м.
122 номерым псалъэу «ДэIэпыкъуэгъу псынщIэм» и гупыр е щIыналъэм епха дохутырыр унэм ираджэм и мызакъуэу, цIыхухэр сымаджэу зэрымылажьэм щыхьэт техъуэ тхылъхэри абыкIэ къыхузэIуахыу, дохутырым яхуитха хущхъуэхэр сымаджэхэм я унэхэм хуашэу, коронавирусым теухуауэ IэщIагъэлIхэм зыхуагъазэу абыхэм я чэнджэщхэм зыщагъэгъуазэу Iуэхур зэтраухуэну зэрамурадри къыхигъэщащ Чернышенкэ Дмитрий.
Москва дуней псом бжьыпэр щеубыд
Туризмэм пщIэ нэхъ щызиIэ дунейпсо зэпеуэхэм ящыщщ «World Travel Awards» жыхуаIэр. Абы и саугъэтыр апхуэдизкIэ яфIэлъапIэщ, ар къэпхьыныр гугъущи, «Туризм IэнатIэм и Оскар» хужаIэ.
Зэпеуэм ущытекIуэныр къызэрымыкIуэу гугъущ, сыту жыпIэмэ иджырей дунейм икъукIэ хуабжьу зыщиужьащ зыплъыхьыным, нэгу зегъэужьыным ехьэлIа Iуэхухэм. ЦIыхухэр зэрыдахьэхыр щIыуэпсым и дахагъым и закъуэкъым, атIэ зыплъыхьакIуэхэм я тыншыпIэхэр къызэгъэпэщынри, къахуеблагъэхэм гукъинэж къащыхъуну хабзэхэм, тхыдэ хъыбархэм, щIыпIэцIэхэр къызытекIахэм щыгъэгъуэзэнри, ерыскъы IэфIкIэ, гурыхькIэ, къэуат зыщIэлъкIэ егуэпэнри - куэд дыдэ къызэщIеубыдэ хьэщIэхуэфI Iуэхухэм.
Туризм IэнатIэм нэхъри зегъэужьыным хуэгъэпса саугъэтыр къэхьыным хуэунэтIа зэпеуэр илъэс къэс ирагъэкIуэкI. Ар 1993 гъэм Инджылызым щагъэуващ. Абы лъандэри ар зыIэрыгъэхьэным, я цIэр дуней псом щызэлъегъэщIысыным хуопабгъэ IэнатIэм щылажьэ IуэхущIапIэ минхэр. Мыгъэрей IэIэтыр зэIухауэ ирагъэкIуэкIащ фокIадэм и 28 - жэпуэгъуэм и 25-хэм къриубыдэу.
2020 гъэм кърикIуахэр зэхалъхьэжащ иджыблагъэ. УнэтIыныгъэ куэду зэщхьэщыхауэ ирагъэкIуэкI зэпеуэм ди къэралым и щыхьэр Москва япэ увыпIэр къыщихьащ «Турист унэтIыныгъэ нэхъыфI. Къалэ» жыхуиIэ и Iыхьэм. Дунейм и къалэ нэхъ инхэм, цIыху мелуанипщIхэр щыпсэухэм ящыщ куэд къыщызэринэкIащ Москва а зэхьэзэхуэм. Псалъэм папщIэ, Нью-Йорк, Париж, Рио-де-Жанейро, Санкт-Петербург хуэдэхэр къылъэщIыхьакъым и дахагъэкIи, и къабзагъэкIи, и щIыпIэ телъыджэхэмкIи.
Къалэм и Iэтащхьэ Собянин Сергей а хъыбарыфIым и гугъу щищIым къыхигъэщащ нэгъаби Москва а саугъэтыр къихьауэ зэрыщытар.
«Туризм индустрием зегъэужьын и лъэныкъуэкIэ мурадышхуэхэр диIэщ икIи ахэр хэтпщэнущ, эпидемиологие щытыкIэм апхуэдэ Iэмал къызэрыдиту. Шэч къытезмыхьэу жысIэфынущ Москва и хьэщIэхэм яригъэгъэщIэгъуэн телъыджэ куэд иджыри зэриIэр икIи а лэжьыгъэм мыгувэу пытщэжыну дыщогугъ. Гъунапкъэхэр зэрызэIутхыжу, IэнатIэм нэхъри зыкъиужьыжынущ - цIыхухэр хуэзэшащ щIэ куэд зрагъэлъагъуным, гурыщIэ гуимыхужхэр, щIэщыгъуэхэр зыхащIэным», - жиIащ къалащхьэм и унафэщIым.
Зэпеуэм и саугъэтхэр, щхьэж щытекIуа унэтIыныгъэ елъытауэ, гуэшыжыным хуэунэтIа гуфIэгъуэ зэхыхьэри ди къалащхьэрщ щызэхэтын хуеяр, ауэ, коронавирус узыфэм дунейр зэщIиубыдауэ зэрыщытым къыхэкIыу, а Iуэхур онлайн мардэм тету ирагъэкIуэкIыну аращ.
Нобэ
♦ПщылIыгъэр гъэкIуэдыным хущIэкъуным и дунейпсо махуэщ. Ди зэманми а махуэм мыхьэнэшхуэ иIэщ: ООН-м къит бжыгъэхэм ятепщIыхьмэ, дуней псом иджыри цIыху мелуан 21-рэ хуэдиз пщылIыпIэм щитщ. Абыхэм яхэтщ цIыхубзи сабии.
♦Урысейм щагъэлъапIэ Банк лэжьакIуэм и махуэр. 1990 гъэм дыгъэгъазэм и 2-м «Урысей Федерацэм и Банк нэхъыщхьэм теухуауэ» федеральнэ законыр къызэращтам тращIыхьу ягъэлъапIэ.
♦Хьэрып Эмират Зэгуэтхэм я лъэпкъ махуэшхуэщ. 1971 гъэм дыгъэгъазэм и 2-м унафэ къащтащ эмиратихыр зэгухьэу, зы къэралыгъуэ къызэрагъэпэщыну.
♦1409 гъэм Лейпциг (Германие) къалэм къыщызэIуахащ Европэм и щынэхъыжь дыдэ университетхэм ящыщыр.
♦1804 гъэм Бонапарт Наполеон Франджым и император хъуащ.
♦1870 гъэм Рим къалэр Италие пащтыхьыгъуэм и щыхьэр хъуащ.
♦1918 гъэм РСФСР-м и ЦIыхубэ комиссархэм я советым тхьэмахуэм къриубыдэу зыгъэпсэхугъуэу махуэ хэха гъэувынымрэ къэрал махуэшхуэхэмрэ ятеухуа хабзэр игъэуващ.
♦1991 гъэм Ингушым референдум щекIуэкIащ Шэшэным къыгуэкIыным теухуауэ. Абы хэтахэм я нэхъыбапIэр апхуэдэ унафэм и телъхьэу къэуври, Ингушыр республикэ щхьэхуэ хъуащ.
♦2007 гъэм Урысейм и Къэрал Думэм и етхуанэ зэхуэсыгъуэм хэтыну депутатхэр хахащ.
♦1897 гъэм къалъхуащ Совет Союзым и Маршал, Совет Союзым тIэунейрэ и ЛIыхъужь, Лениным и орденыр блэнейрэ зыхуагъэфэща Баграмян Иван.
♦1913 гъэм къалъхуащ шэрджэс усакIуэ, тхакIуэ, Хэку зауэшхуэм хахуэу зэрыхэтам папщIэ Вагъуэ Плъыжь орденыр, Хэку зауэ орденым и етIуанэ нагъыщэр зыхуагъэфэща Гъуэщокъуэ Хъусин.
♦1923 гъэм къалъхуащ совет публицист цIэрыIуэ, дипломат, жылагъуэ лэжьакIуэ Яковлев Александр.
♦1923 гъэм къалъхуащ алыдж оперэ уэрэджыIакIуэ Каллас Марие.
♦1946 гъэм къалъхуащ Италием щыщ дизайнер, модельер цIэрыIуэ, Версаче Джанни.
♦1960 гъэм къалъхуащ тхыдэ щIэныгъэхэм я доктор, профессор Гуанэ Аскэрбий.
Дунейм и щытыкIэнур
«pogoda.yandex.ru» сайтым зэритымкIэ, Налшык уфауэ щыщытынущ. Хуабэр махуэм градуси 2 - 3, жэщым 1 градус щыхъунущ.
Лъэпкъ Iущыгъэ:
ДаущыфIыр щылъу даущ бзаджэр мэIу.
