Гъуэгу махуэ, «Адыгэ щауэ»!

Ди газетым зэрытетащи, Къэбэрдей Адыгэ Ха­сэмрэ Кэнжэ къуажэм ЩэнхабзэмкIэ и уардэ­унэм и лэжьакIуэхэмрэ къыхалъхьа «Адыгэ щауэ» республикэ зэпеуэм­ и щIыналъэ Iыхьэр Джылахъстэнейм щрагъэкIуэкIащ. Абы хэтащ щIыналъэм и къуа­жэхэм къикIа щIалибгъу.

Адыгэ фащэкIэ хуэпауэ, адыгэ ныпыр ­хуарзэу яIыгъыу Тэрч къалэм и уэрам нэхъыщхьэм кърикIуа шууейхэм зэпеуэр къызэ­Iуахащ.
Я акъыл жанагъкIэ, Iэры­хуагъкIэ, шы гъэхъукIэм зэ­рыхащIыкIкIэ, лъэпкъ хабзэхэм зэрыщыгъуазэкIэ щIа­лэхэм я зэфIэкI зды­нэсыр къаху­тэну зэхьэ­зэ­хуэм кърагъэблэгъат Джы­лахъстэней Адыгэ Хасэм и тхьэмадэ Ахъсор Хьэлым, районым ГъуазджэхэмкIэ и уардэунэм и унафэщI Пщыншэ Хьэлым, Тэрч щIыналъэ администрацэм щэнхабзэмкIэ и къудамэм и унафэщI Накуэ ­Сослъэн, ЩэнхабзэмкIэ  уардэунэм и унафэщI КIэрэф Мурадин, Сабий зэчиифIэхэм я унэм и лэжьакIуэ Хьэмы­къуэ Мадинэ, щIыналъэм  и «Шууей хасэм» и тхьэмадэ Iэщыж Залым, «Терчанка» къэфакIуэ гупым и унафэщI ГуэныкIэ Лиуан сымэ.
«Си къежьапIэ» Iы­хьэм щIалэхэм щхьэж къы­зы­хэ­кIа лъэпкъым и лIакъуибл­кIэ еIэбэкIыжри, я нэхъыжь­хэм я цIэхэр къра­Iуащ, ­езы­хэр къыщы­хъуа уна­гъуэр ирагъэцIыхуащ. Адэ­кIэ «Лъэпкъ гуры­щIа­сэ» Iы­хьэм щIалэ­хэм я Iэп­щIэ­лъапщIагъыр,­ ябгъэ­дэлъ творческэ зэфIэкIыр на­Iуэ щащIащ. Хэт пшы­нэ еуащ, хэти и лъэгу щIигъэплъащ, хэти адыгэ уэ­рэ­дыжь жи­Iащ. Къы­кIэ­лъы­кIуэу щIалэхэм я акъыл ­жа­нагъыр, я Iуэху еплъыкIэр хэIущIыIу къызэращIыфыр ягъэу­нэхуащ. «Адыгэ лъэп­къым и тхыдэ» Iыхьэри гъэщIэ­гъуэну ягъэзэщIащ щIалэхэм. Лъэп­къым ижь-ижьыж ­лъандэрэ къы­дэ­гъуэгуры­кIуэ IуэрыIуатэм и лIы­хъужьхэм, абыхэм я ­дуней тетыкIам тепсэ­лъы­хьащ. Пэшым щIэсхэр хуабжьу яфIэгъэщIэгъуэну едэ­Iуащ тхыдэм щыщ уэ­рэдхэр щызэпкърах Iыхьэми. АдэкIэ шы Iэпс­лъэпс­хэм, абыхэм я къалэным щIалэхэм я гугъу ящIри, ар видеонэтын кIэщIкIэ щIагъэбыдэжащ. Иужьрей Iы­хьэм щIалэхэм адыгэ лъэп­къым хъуэхъукIэ зы­хуа­гъэзащ.
УнэтIыныгъибгъукIэ зыкъагъэлъэгъуа, адыгэ щауэм хэлъын хуей хьэл-щэн дахэмрэ иIэн хуей къэу­хьымрэ щхьэж зэры­хузэ­фIэкIкIэ къагъэнэIуа иужь, къэпщытакIуэ гупым Гран-Прир хуагъэфэщащ Болэтей къуажэм щыщ Балъкъэр Елдар. Япэ увыпIэр къихьащ Щамырзэ Роберт (ХьэпцIей къуажэ), етIуанэ хъуар ТIымыжь Анзорщ (Абейкъуажэ), ещанэр Алъхъэс Iэсхьэдщ (Тэрч къалэ). Абыхэм иратащ Къэ­бэрдей, Джылахъстэней Адыгэ Ха­сэхэм, Тэрч щIы­налъэм щэн­хабзэмкIэ и ­къудамэм къабгъэдэкI щIыхь тхылъ­хэмрэ фэеплъ саугъэтхэмрэ.
Зэпеуэм жыджэру хэтахэу Былымыхь Асте­мыр, Урым Алим, Шэрий Ис­лъам, АфIэу­нэ Анзор сыми щIыхь тхылъхэмкIэ ягъэ­пэжащ.
Ахъсор Хьэлым къы­щып­салъэм жи­Iащ лъэпкъ хабзэр, тхы­дэр, анэдэлъхубзэр зи лъабжьэ  а зэпеуэр фIы куэд къызы­хэпхын зэхыхьэ дахэхэм ящыщу къызэрилъытэр, а Iуэхум дяпэкIи нэхъыфIыжу, екIуу къыпащэну зэры­щыгугъыр.
- ЩIалэгъуалэр зэпеуэн хуей хъуамэ, хабзэкIэ, нэ­мыскIэ, адыгагъэкIэ, цIыхугъэкIэ, IэпщIэлъапщIагъэ­кIэ, акъыл жанагъкIэ фIэкIа зэпэщIэмыувэу, ефIа­кIуэу, ехъулIэу псэуну си гуапэщ, - захуигъэзащ абы къызэхуэсахэм.
Накуэ Сослъэн «Адыгэ щауэхэм» щехъуэхъум къыхигъэщащ ирагъэжьа зэ­пеуэр икъукIэ Iуэху дахэу къызэрилъытэр.
- Республикэм «Адыгэ щауэ» зэпеуэр япэу щедгъэжьащ, сызэреплъымкIи, щIэдзапIэр къыдэхъу­лIауэ къэплъытэ хъунущ. Си гуапэщ мы зэ­хыхьэм щIалэгъуалэ куэду къы­зэ­рырихьэлIар, абыхэм мы утыкум итахэр щапхъэ ­яхуэхъумэ, щIэблэр ядэп­лъей­мэ, ­гъуэгу дахэ ягъуэ­ты­нущ. Я зэман къыдагъахуэу, я Iуэху ирагъэкIуэ­­тэ­кIыу къытхуе­б­лэгъа нэхъыжьыфIхэри жьыщ­хьэ махуэ фыхъу. ЩIа­лэхэр ­зыгъэхьэзырахэм, абыхэм елIалIэу ябгъурытахэм фIыщIэ фхуэфащэщ. «Адыгэ щауэ» зэпеуэм ­утыку къришахэм уи щхьэр ­лъагэу уамыгъэлъагъу­жыну зы щIали яхэткъым, щхьэж къызыдэкIа жылэ­жьым и напщIэщ, и пщIэщ. Тхьэм фригъэфIакIуэ, хывигъэгъахъуэ!
Iэщыж Залыми ехъуэ­хъуащ «Адыгэ щауэхэм».
Пшыхьыр я уэрэд, къафэ екIухэмкIэ ягъэдэхащ Уэщ­ро Альберт, Жылау Ларисэ, ныбжьыщIэ къэфакIуэ гуп­хэм, нэгъуэщIхэми.

Балъкъэр Елдар

Щамырзэ Роберт

Сурэтхэр Къарей Элинэ трихащ.