Белоруссием и къэрал кIуэцI Iуэхухэм хэIэбэну зыри хуиткъым
УФ-м и Президент Путин Владимир иригъэкIуэкIащ къэралым ШынагъуэншагъэмкIэ и Советым зэпымыууэ хэтхэм я зэIущIэр. Абы зыщытепсэлъыхьахэм ящыщщ Белоруссием щыщыIэ щытыкIэр.
ЗэIущIэм хэтащ УФ-м и Правительствэм и Iэтащхьэ Мишустин Михаил, УФ-м ФедерацэмкIэ и Советымрэ Къэрал Думэмрэ я унафэщIхэу Матвиенкэ Валентинэрэ Володин Вячеславрэ, ШынагъуэншагъэмкIэ Советым и УнафэщIым и къуэдзэ Медведев Дмитрий, УФ-м ШынагъуэншагъэмкIэ и Советым и секретарь Патрушев Николай, къэрал кIуэцI IуэхухэмкIэ министр Колокольцев Владимир, нэгъуэщI къэрал IуэхухэмкIэ министр Лавров Сергей, зыхъумэжыныгъэмкIэ министр Шойгу Сергей, ФСБ-м и унафэщI Бортников Александр, къэралщIыб тIасхъэщIэх къулыкъущIапIэм и унафэщI Нарышкин Сергей, Президентым щIыуэпсыр хъумэнымкIэ, экологиемрэ транспортымкIэ и лIыкIуэ хэха Иванов Сергей сымэ.
«Президентым зэIущIэм хэтхэм яжриIащ къэрал унафэщI зыбжанэм телефонкIэ зэрепсэлъылIар икIи нэхъыбэу зи гугъу ящIари Белоруссием къыщыхъуахэр зэрыарар. Путин Владимир тхьэмахуэ зэхуаку блэкIам къриубыдэу епсэлъащ Европэ Советым и унафэщI Мишель Шарль, Франджым и президент Макрон Эммануэль, ФРГ-м и канцлер Меркель Ангелэ, Тыркум и президент Эрдогъан Реджеп Тайип сымэ. А зэпсэлъэныгъэхэм къарикIуахэми зэIущIэм хэтхэр зэпкърыхауэ щыгъуазэ ищIащ Путиным, - жиIащ Президентым и пресс-секретарь Песков Дмитрий. - Президентым зэпсэлъахэм ягуригъэIуащ Белоруссием и къэрал кIуэцI Iуэхухэм хэIэбэну зыри зэрыхуимытыр икIи а хэкум щыпсэухэмрэ абы и унафэщIхэмрэ зэпсалъэурэ зэгурыIуэжыным фIэкIа абы хэкIыпIэ зэримыIэр».
ШынагъуэншагъэмкIэ Советым и зэIущIэм апхуэдэуи щытепсэлъыхьащ дунейм щытыкIэр зэпIэзэрыту щыщытынымкIэ щыIэ хэкIыпIэхэмрэ IэщэкIэ зызэщIэузэдэныр уи нэIэм щIэбгъэкI зэрымыхъунумрэ ятеухуауэ иджыблагъэ ирагъэкIуэкIа урысей-америкэ зэпсэлъэныгъэхэм кърикIуахэми, УФ-м и социальнэ, экономикэ я лъэныкъуэкIэ и Iуэху зыIутхэми.
Ким Чен Ын и пIэ иувэнум топсэлъыхь
Дунейм и хъыбарегъащIэ IуэхущIапIэхэр гулъытэ нэхъыбэ зыхуащIу мы махуэхэм зытепсэлъыхьхэм ящыщщ Корее Ищхъэрэм и унафэщI Ким Чен Ын сымаджэ зэрыхъуар. Абы укъимыщIэуи жаIэ.
Кореем и унафэр пIалъэкIэ ищIыну и пщэ дилъхьэжащ абы и шыпхъу Ё Чжон.
«Къэралым и Iэтащхьэ къулыкъур зэрызэIэпахыну щIыкIэр зэкIэ нэсу убзыхуакъыми, унафэщIу щытыныр и пщэ къыдэхуэу къелъытэж Ким Ё Чжон. Къэрал унафэр зыми IэщIэмылъу щыт хъунукъым», - жиIащ Корее Ипщэм и дипломату щыта Мин Чан Сон. Абы и псалъэхэм щыхьэт техъуэ, ахэр щIэзыгъэбыдэ щыIэкъым. Аращи, абыхэм тебгъэчыныхьи мыхъуну къыщалъытэ къэралым.
НэгъуэщI хъыбари щыIэщ а Iуэхум теухуауэ. Корее Ипщэм и лъэпкъ тIасхъэщIэх IуэхущIапIэм зэрыщыжаIамкIэ, Ким Чен Ын и къулыкъукIэ зыхуит гуэрхэр езым и дэIэпыкъуэгъухэм махуэ зыбжанэ ипэкIэ пщэрылъ ящищIауэ щытащ. Апхуэдэ дзыхь зригъэзахэм яхэтщ къэрал унафэщIым и шыпхъу нэхъыщIэри.
Корее Ищхъэрэм и унафэщIыр зэрысымаджэр, ар и къулыкъум текIынкIэ зэрыхъунур икIи абы и пIэ иувэнур зэрагъэхьэзырым теухуа хъыбархэр къызэрырахьэжьэрэ зыкъом щIащ, ауэ иджы ар нэхъри тегъэчыныхьауэ зэбграгъэх хъуащи, мыгувэу наIуэ къэхъуну къыщIэкIынущ Iуэхухэм я пэжыпIэ дыдэр.
Нобэ
♦Абхъазым и щхьэхуитыныгъэм и махуэщ
♦Осетие Ипщэм и щхьэхуитыныгъэм и махуэщ
♦Тыркум IэщэкIэ зэщIэузэда и къарухэм я махуэщ
♦США-м щагъэлъапIэ цIыхубзхэр я хуитыныгъэкIэ цIыхухъухэм зэрыхуагъадэм и махуэр
♦1382 гъэм тэтэр хъан Тохъутэмыщ и дзэм Москва къиубыдащ икIи абы лыгъэ иридзащ. Абы кIэлъыкIуэу яубыдат Владимир, Переяславль, Юрьев, Звенигород, Можайск къалэхэр.
♦1723 гъэм Петергоф псыутххэм я комплекс щаутIыпщащ.
♦1728 гъэм Беринг Витус Америкэмрэ Азиемрэ я псыдэжыпIэр къихутащ. Зэман дэкIри, абы къэхутакIуэм и цIэр фIащыжащ.
♦1770 гъэм Экономикэ зэгухьэныгъэ щхьэхуитым къыдигъэкIа «Лэжьыгъэр» тхылъым ихуащ кIэртIофым теухуа тхыгъэ. Урыс щIэныгъэлI-агроном Болотов Андрей абы щызэпкърихырт кIэртIофыр хэсэн зэрыхуей щIыкIэр, ар зэрызепхьэну, къызэрыптIыжыну, зэрыпхъумэну щIыкIэхэр, ар ерыскъыфIу зэрыщытми щытригъэчыныхьырт.
♦1858 гъэм телеграф Iэмэпсымэр япэу къагъэсэбэпауэ щытащ
♦1943 гъэм советыдзэм щIидзащ Днепр псыр нэмыцэ зэрыпхъуакIуэхэм къаIэщIэгъэкIыжыным, Украинэм щыщ Iыхьэр хуит къэщIыжыным хуэунэтIа зауэм.
♦1972 гъэм Германием и Мюнхен къалэм къыщызэIуахащ ХХ Гъэмахуэ Олимп Джэгухэр. ФокIадэм и 10 пщIондэ екIуэкIа а зэхьэзэхуэхэм хэтащ къэрали 121-м я лIыкIуэу цIыху 7170-рэ. Олимпиадэр здекIуэкIым нэщхъеягъуэшхуэ къэхъуат - Израилым и командэм щыщ цIыху 11 хэкIуэдауэ щытащ журтхэм яхуэгъэзауэ ялэжьа терактым.
♦1908 гъэм Тыркум япэ Адыгэ Хасэ къыщызэрагъэпэщащ.
♦1991 гъэм РАН-м прикладной математикэмрэ автоматизацэмкIэ и Къэбэрдей-Балъкъэр щIэныгъэ-къэхутакIуэ институтыр къызэIуахащ.
♦2000 гъэм Урысей Федерацэм и Президент Путин Владимир Iэ щIидзащ «Курск» псыщIагъырыкIуэ кхъухьым исахэм я лIыхъужьыгъэр гъэлъэпIэным, абыхэм фэеплъхэр яхуэгъэувыным теухуа Указым.
♦1451 гъэм къалъхуащ Америкэр зэрыщыIэр къэзыхута Колумб Христофор.
♦1925 гъэм къалъхуащ урысей кинорежиссёр, оператор, актёр, композитор, фильм зыбжанэм я сценарийхэр зытха Тодоровский Пётр.
♦1947 гъэм къалъхуащ педагогикэ щIэныгъэхэм я доктор, Педагогикэ егъэджэныгъэмкIэ дунейпсо академием и член-корреспондент Зэгъэщтокъуэ Хьисэ.
♦1947 гъэм къалъхуащ урысей актёр, УФ-м щIыхь зиIэ и артист Арлазоров Ян.
♦1952 гъэм къалъхуащ «Тетраграф» ООО-м и унафэщI, ДАХ-м и саугъэтыр зыхуагъэфэща Шакъ Елберд.
♦1976 гъэм къалъхуащ урысей уэрэджыIакIуэ, музыкант, композитор Земфирэ.
Дунейм и щытыкIэнур
«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Хуабэр махуэм градус 25 - 27-рэ, жэщым градус 15 - 17 щыхъунущ.
Лъэпкъ Iущыгъэ:
Гурымыкъ гурымыкъ и щIасэщ.
