Театреплъхэр дэзыхьэх ХьэхъупащIэ ФатIимэ

ЩоджэнцIыкIу Алий и цIэр зезыхьэ Къэбэрдей къэрал драмэ театрым и утыкур зыгъэбжьыфIэ, теплъэ зэкIужым къыдэкIуэу, зэфIэкIкIи Тхьэр зыхуэупса, хьэл-щэн дахэхэр зыдэплъагъу, зи  анэдэлъхубзэр зи псэм хэлъ, ар дэнэ утыкуи екIуу щызыгъэIу ХьэхъупащIэ ФатIимэ ди республикэм къищынэмыщIауэ, гъунэгъу щIыналъэхэми, Тыркум щыпсэу адыгэхэми къацIыхуа артисткэщ.

ИлъэсийкIэ узэIэбэкIыжмэ, лэжьэн щIидзагъащIэу, япэ дыдэу театрым къыщыхуагъэфэща (Фырэ Руслан игъэува «Лъагъуныгъэм итхьэкъуа цIыхубзийр» трагикомедием   Катрин у щыджэгуащ) роль нэхъыщхьэр ФатIимэ къехъулIам и мызакъуэу, ар икIи хуэугъурлыуэ къыщIэкIат. Адыгэ театрым и артисткэ цIэрыIуэхэу ЖьакIэмыхъу КIунэ, Балъкъэр Тамарэ, Хьэмыку Жаннэ сымэ я гъусэу зы утыку щыджэгуну къызэрыхуихуар хъыджэбз цIыкIум насыпышхуэу, театрым и гъурми и цIынэми фIыуэ щыгъуазэ нэхъыжьхэм ядэплъеинымкIэ, абыхэм я деж и IэщIагъэм и щэхухэм щыхуеджэнымкIэ IэмалыфIу къилъытэрт.
- ФIыуэ къызгурыIуэрт си япэ лэжьыгъэм зэрызыкъыщызгъэлъагъуэм куэд дыдэ зэрелъытар. Абы роль зыбжанэ къыкIэлъыкIуащ. Апхуэдэу гукъинэж сщыхъуа икIи си зэфIэкIым куэдкIэ зезыгъэужьа лэжьыгъэхэм ящыщщ «Насыпыр хьэжьщ» комедиер (Мэгги), «Уахътыншэхэр» (Вероникэ) драмэр, ЕмкIуж Андзор и «Мыщэ и къуэ Батыр» таурыхъыр (лIыхъужь нэхъыщхьэм и пщащэр), «Хьэпэщыпхэ» комедиер (Мадинэ), Джалиев ­Къазбэч и «ЩIакIуэ фIыцIэ» (Чобра) нэгъуэщIхэри. Къыхэзгъэщынут, ЕмкIуж Андзор спектаклым къалэн щысщищIу уэрэд жыIэнымкIэ си зэфIэкIым нэ­гъуэщIынэкIэ сызэрыригъэплъыжар, уэрэд зыбжанэ згъэзащIэу зэрыригъэтхам и фIыгъэкIэ нэхъыбэм сыкъызэрацIыхуар. Абы и лъэныкъуэкIэ Андзор фIыщIэ хуэфащэщ икIи хуабжьу сыхуэарэзыщ. Сызыдэлэжьа дэтхэнэ зы режиссёрми зызигъэужьащ, си зэфIэкIыр къызэIусхын и лъэныкъуэкIэ къыздэIэпыкъуащ, - жеIэ ФатIимэ.
Сочэ къалэм щекIуэкIа етIуанэ дунейпсо кинофестивалымрэ «SIFFA» киносаугъэтымрэ я нэгузыужь программэм хыхьэу гъэкIэщIауэ ягъэлъэгъуа, «Гуащэнэ» роман-драмэм къытращIыкIа спектаклым Гуащэнэ и ролыр гукъинэжу къеыщехъулIащ ХьэхъупащIэм. Абы артисткэ зэчиифIэм ехъулIэныгъэ иIэу утыку къыщрихьащ зи ныбжьыр илъэс 15 фIэкIа мыхъу адыгэ пщащэм къалэнышхуэ и пщэ къыдэхуауэ зэрыщытар. Кинофестивалым зыкърезыгъэхьэлIахэм щIэщыгъуэ ящыхъуу абыхэм я пащхьэм Хьэхъупащэм щигъэлъэгъуащ ди лъэпкъым и блэкIар, урыс къэралыгъуэм и тхыдэм хэпщIа хъуа адыгэ бзылъхугъэм къикIуа гъащIэ гъуэгуанэр.
Дуней псом дин, щIыналъэ зэмылIэужьы­гъуэхэм щыщхэр зыхэта кинофестивалым хыхьэу адыгэм и тхыдэр зи лъабжьэ лэжьыгъэм ФатIимэ и зэфIэкI щигъэлъэгъуэну Iэмал зэриIар лъапIэу къелъытэ. Апхуэдэ роль игъэзэщIэну куэд щIауэ и хъуэпсапIэт икIи ар къызэрехъулIам иринасыпыфIэщ артисткэ зэчиифIэр.
Тыркум щылажьэ Адыгэ Хасэм хэт, радиом и лэжьакIуэ Емуз Баязит Адыгэ щэнхабзэмрэ гъуазджэмрэ я дунейпсо фестивалыр ХьэхъупащIэ ФатIимэ иригъэкIуэкIыну мы гъэм  зэрыригъэблэгъар гуапэ щыхъуауэ щытащ. Хэкурыс хъыджэбзым ар и хъуэпсапIэ инти, пщэрылъ къыщащIа  къалэныр пщIэ зыпылъу къилъытащ икIи дамэ къытригъэкIащ. КъыжыIапхъэщ, пшыхьыр  ФатIимэ тыркубзэкIэ къыдезыгъэкIуэкIын хуея щIалэм абы адыгэбзэр гум дыхьэу, дахэу зэригъэшэрыуэм гу къыщылъитэм езым и псалъэр лей къыщыхъужу лъэныкъуэ зэрызригъэзыжар,  хъыджэбзым зэрыпшыхьу пщэрылъ къызэрыщищIыжар.
- Хэхэс адыгэ мин бжыгъэхэм я пащхьэм сыкъыщихьам си гум щыщIар къэIуэтэжыгъуейщ, ди лъэпкъэгъухэр хамэ щIыналъэм куэду зэрыщыIэр апхуэдизкIэ зыхэсщIат, абы зэуэ сигъэгуфIат икIи сыкъигъэнэщхъеяти. Ди лъэпкъэгъухэм анэдэлъхубзэр нэхъ екIуу зэрабгъэдэслъхьэным, пшыхьыр нэхъ гукъинэжу зэрызыхезгъэщIэным сыхущIэкъуащ. Мараш, Гёксун къалэхэм, нэгъуэщI зы адыгэ къуажи щIыгъужу концерт гукъинэжхэр Тыркум щыттащ, - къыддогуашэ ФатIимэ. - Ди республикэм икIахэм ящыщу пшыхьыр ягъэдэхащ «Кабардинка» къэрал академическэ къэфакIуэ ансамблым, уэрэджыIакIуэ Iэзэхэу Хьэкъул Оксанэ, Мамхэгъ Иннэ (Черкесск къалэ) сымэ, нэгъуэщIхэми. Хэхэс адыгэхэр гуапэу къытIущIащ, гуфIэ нэпсхэр къызыфIекIуахэр гъунэжу, адэкIи дызэкIэлъыкIуэныр, ди зэныбжьэгъугъэр дгъэбыдэныр зэрафIэфIыр я псалъэм къыхагъэщу хуабагъ ди зэхуаку дэлъу дызэбгрыкIыжащ. Фестивалыр къыхэзылъхьахэм фIыщIэ яхуэфащэщ адыгэбзэр, хабзэр хъумэныр зыхаухуэна Iуэху дахэр икIи щхьэпэр гукъинэжу къазэрехъулIам, абы хэкурысхэри гуапэу дызэрырагъэблэгъам папщIэ.

ТЕКIУЖЬ Заретэ. Сурэтыр Къарей Элинэ трихащ.
Поделиться: