«Мэкъумэшбанкыр» илъэс тIощI ирокъу

Юбилей

Урысейм и «Мэкъумэшбанк» акционер обществэм и юбилейр иджыблагъэ игъэлъэпIащ.

Къэралым офис 1300-м щIигъу щызиIэ «Мэкъумэшбанк» АО-р Урысейм и щIыналъэм нэхъ зыщызыубгъуа банкищым языхэзщ. Абы и дзыхьыр ирагъэз клиент мелуани 7-м щIигъум.
Банкым и лэжьыгъэр къыгуэхыпIэ имыIэу епхащ агропромышленнэ комплексым. Иужь илъэс тIощIым абы хэпщIыкIыу зиужьащ. А лъэхъэнэм Урысейм и «Мэкъумэшбанк» акционер обществэм хузэфIэкIахэр къапщытэжащ абы и КIэлъыплъакIуэ Советым и тхьэмадэ, УФ-м мэкъумэш хозяйствэмкIэ и министр Патрушев Дмитрийрэ АО-м и Правленэм и унафэщI Листов Борисрэ.
2000 гъэм къэралым и Iэтащхьэм унафэ ищIащ Урысейм и агропромышленнэ комплексым и кредит-финанс системэм телэжьэну банк къызэрагъэпэщыну. БлэкIа илъэс тIощIым къриубыдэу мэкъумэш хозяйствэм зыужьыныгъэшхуэ игъуэтащ икIи иджыпсту ар экономикэр ипэкIэ зыгъэкIуатэщ. Къэралым и мэкъумэшыщIэхэм къызэрагъэпэщ Урысей Федерацэм и ерыскъы шынагъуэншагъэр икIи щIагъэхуабжьэ нэгъуэщI къэралхэм я продукцэр ирагъэшэныр.
УФ-м мэкъумэш хозяйствэмкIэ и министр Патрушев Дмитрий къыхигъэщащ «Мэкъумэшбанк» акционер обществэм отраслым зэрызыдиужьар, агробизнесым и хьэрычэтыщIэ мащIэмрэ курытымрэ, къуажэдэс псоми сыт щыгъуи мылъкукIэ щIэгъэкъуэн нэс яхуэхъукIэрэ. «Нобэ Урысейм и «Мэкъумэшбанк» АО-р ящыщщ къэралым и финанс IуэхущIапIэ нэхъ лъэщхэм икIи зэпIэзэрытхэм. Абы щыгъуэми агропромышленнэ комплексым дэщIыгъуу и зэфIэкIхэм хохъуэ, бжыгъэхэр зи лъабжьэ технологиехэм, фермер зэщIэхъееныгъэм, къуажэ щIыналъэхэм зегъэужьыным гулъытэшхуэ яхуищIу. Зэманым къигъэув къалэнхэм пэджэжкIэрэ банкыр ипэкIэ мэкIуатэ, Iуэхутхьэбзэ ищIэхэм хигъахъуэурэ», - жиIащ Патрушев Дмитрий.
«Ди банкыр къыщызэрагъэпэща 2000 гъэхэм я пэщIэдзэр къэралым и дежкIэ лъэхъэнэ хьэлъэу щытащ, - къыпещэ псалъэмакъым Урысейм и «Мэкъумэшбанк» акционер обществэм и Правленэм и унафэщI Листов Борис. - Абы щыгъуэм къалэн къытщащIат АПК-р ахъшэ щIыхуэкIэ къызэгъэпэщыныр зэтедублэну. Иджыпсту быдэу жысIэфынущ ар фIы дыдэу къызэрыдэхъулIар. Урысейм и ерыскъы шынагъуэншагъэр апхуэдэ щIыкIэкIэ зэтеуващ. Мэкъумэш хозяйствэм иджы фейдэ къит къудейкъым, атIэ къэралым и экономикэм и пашэщ. Ар лъэ быдэкIэ щыуващ Урысей Федерацэми дунейпсо рынокми. Дэ фIы дыдэу къыдгуроIуэ: бжыгъэхэр зи лъабжьэ технологиещIэхэр къызэрагъэсэбэпым елъытащ АПК-м и къэкIуэнури къэралым и экономикэри. Мыхьэнэ пыухыкIа иIэщ Урысейм и махуэм къыкIэлъыкIуэу занщIэу мэкъуауэгъуэм и 13-м «Мэкъумэшбанк» АО-р къыщызэрагъэпэщар зэрыдгъэлъапIэм. Дэ зэпыхыпIэ имыIэу дыпыщIащ Хэкум, абы и тхыдэмрэ щэнхабзэмрэ. Урысей Федерацэм и зыужьыныгъэращ ди унэтIыныгъэ нэхъыщхьэу сыт щыгъуи къэнэжыр».
И юбилейм ирихьэлIэу Урысейм и «Мэкъумэшбанк» акционер обществэм къыхилъхьащ «ФIы щIэ» проект щхьэхуэр икIи «Гъавэ» программэм нэхъри зригъэубгъуащ. АбыкIэ къалэмрэ къуажэмрэ зэрешалIэ, фермерхэм я продукцэр губгъуэм къызэрикIауэ щэхуакIуэхэм яIэрыхьэныр псынщIэу къызэригъэпэщкIэрэ.
КъищынэмыщIауэ, 2020 гъэм Урысейм и «Мэкъумэшбанк» АО-м и деж къыщызэIуахынущ фермерхэм я еджапIэ. Абы и фIыгъэкIэ мэкъумэшыщIэхэм я щIэныгъэхэм хагъэхъуэфынущ икIи КФХ-м нэхъыбэу зрагъэубгъунущ. ЩIыналъэхэм лэжьапIэщIэхэр къыщыунэхунущ, хадэхэкI, пхъэщхьэмыщхьэ щIэщыгъуэхэр куэду къыщагъэкIынущ.

 

Хьэтау Ислъам.
Поделиться: