Дохутырхэр ягъэгушхуэ

Налшык къалэ округым Ведомствэм хэмыхьэ и хъумакIуэ IэнатIэм и лэжькIуэ-хэр иджыпсту щыIэ щытыкIэ гугъум иту госпиталхэм щылажьэ дохутырхэмрэ студентхэмрэ я деж щыIащ.

Урысей гвардием и лIыкIуэхэм медицинэ лэжьакIуэхэм я махуэкъэс лэжьыгъэ гугъум папщIэ фIыщIэ хуащIащ икIи ерыскъы щIэщыгъуэхэмкIэ яхуэгуэпащ. Абыхэм дохутырхэм хуахьащ шей, кофе, пхъэщхьэмыщхьэ, IэфIыкIэ зэмылIэужьыгъуэхэр.
- Медицинэм и лэжьакIуэхэр нобэ ди гулъытэ хуэныкъуэщ, абыхэм ящыщ дэтхэнэми и къару псори ирехьэлIэ ди къэралым и цIыхухэм я узыншагъэр, гъащIэр хъумэным, - жиIащ Налшык къалэ округым Ведомствэм хэмыхьэ и хъумакIуэ IэнатIэм и батальоным и командир, полицэм и полковник Хьэмыз Анзор.
Дохутырхэмрэ медицинэм хуеджэ студентхэмрэ жаIащ Урысей гвардием и лIыкIуэхэм къыхуащIа гулъытэр я гуапэ зэрыхъуар.