ТекIуэныгъэм и махуэшхуэр ягъэлъапIэ

Бахъсэн районым накъыгъэм и 9-р щагъэлъапIэм, Хэку зауэшхуэм хэкIуэдахэм я фэеплъхэм удз гъэгъахэр тралъхьащ икIи ветеранхэм концертхэр къыхузэрагъэпэщащ.

Накъыгъэм и 9-м Хэкум и хъумакIуэхэм я фэеплъ псоми, Бахъсэн районым и къуажэхэм щыIэ къуэшыкхъэ 13-р къызэщIиубыдэу удз гъэгъахэр тралъхьащ.
ХьэтIохъущыкъуей къуажэм и «Хэку зауэшхуэм и зэманым хэкIуэдахэр» фэеплъым район администрацэм и Iэтащхьэ Балъкъыз Артуррэ жылэм и унафэщI Къумыкъу МуIэедрэ удз гъэгъахэр тралъхьащ икIи хэкIуэдахэм зы дакъикъэкIэ яхуэщыгъуащ.
Зэхыхьэ нэужьым район администрацэм и Iэтащхьэм районым щэнхабзэмкIэ и лэжьакIуэхэр зыхэт «Фронтовая бригада» гупым я гъусэу кIуащ Хэку зауэшхуэм и ветеран Кобылкин Иван и унэм.
Зауэм и ветераным и щхьэгъубжэм деж щагъэуващ махуэшхуэ концертыр щрагъэкIуэкIыну ягъэIэпхъуэ сценэм. Уз зэрыцIалэм и зэранкIэ Иван унэм къыщIэкIыфакъым икIи ар балконым къихьэри, концертым еплъащ.
Балъкъэыз Артур ветераным гуапэу ехъуэхъуащ ТекIуэныгъэ Иныр къызэрытхьрэ илъэс 75-рэ зэрырикъумкIэ, узыншагъэ быдэ, гъащIэ кIыхь иIэнуи зыхуигъэзащ.
- Нобэ къэралыр щытыкIэ гугъу ихуащ икIи районым къыщызэдгъэпэщыну дыубзыхуа зэхыхьэхэр едгъэкIуэкIыфыркъым, ауэ ди гуми ди псэми къабгъэдэкIыу фIыщIэ ин пхудощI. Уи лIыхъужьыгъэм, зауэлI, граждан къалэным узэрыхуэпэжам, Хэкум хууиIэ лъагъуныгъэм узэремыпцIыжам папщIэ Тхьэм уигъэпсэу!», - къыхигъэщащ Балъкъыз Артур ветераным зыщыхуигъазэм.
Концертыр и кIэм щынэблагъэм, ветераным пщIэ хуащIу хьэрэкIытIэхэр драгъэлъэтеящ.