Дунейм щыхъыбархэр

Къэрал кIуэцI  гъунапкъэхэр зэхуащI хъунукъым

Урысей Федерацэм и Премьер-министр Мишустин Михаил и къуэдзэхэм ядригъэкIуэкIа зэIущIэм къыщыхигъэщащ къэрал кIуэцIым гъунапкъэхэр щызэхуащIыныр къэбгъэхъу зэрымыхъунур.

Тхьэмахуэ зэхуаку блэкIам къэралым и субъект зыбжанэм я административнэ гъунапкъэхэр зэхуащIу, я щIыналъэхэм цIыхухэри транспортри ирамыгъэхьэну яужь зэритам теухуа хъыбархэм къызэрагъэуIэбжьар къыхигъэщащ Правительствэм и УнафэщIым. Урысейм и щIыналъэхэм я унафэщIхэр Мишустиным къыхуриджащ сыт хуэдэ Iуэхуми я деж щыIэ щытыкIэхэм теухуауэ бгъэдыхьэну.
«ЩIыналъэхэм я Iэтащхьэхэм иджыри зэ захуэзгъэзэну сыхуейщ: езыхэм яIэ хуитыныгъэхэр федеральнэ къулыкъущIэхэм ейм хамыгъэзэрыхьыну», - жиIащ Мишустин Михаил.
Абы къыхигъэщащ сыт хуэдэ Iуэхуми теухуа унафэр къыщащтэкIэ, Президентымрэ УФ-м и Правительствэмрэ къагъэува мардэхэм ар изагъэу щытын зэрыхуейр. НэгъуэщI къэралхэмрэ Урысей Федерацэмрэ я зэхуакум хуэзэ гъунапкъэхэмрэ субъектхэм яку дэлъымрэ зэхуэпщIыныр тIури зыкъым. Ар зыщамыгъэгъупщэну икIи узыфэм щыпэщIэткIэ егъэлеиныгъэ, цIыхухэм я хуитыныгъэхэр къыщызэпауд къамыгъэхъунми я нэIэ трагъэтыну яхуигъэуващ Премьер-министрым щIыналъэ унафэщIхэм.
Апхуэдэ хъыбар къазэрыIэрыхьэу, Правительствэм икIэщIыпIэкIэ унафэ трищIыхьащ а Iуэхум, ауэ Премьер-министрыр абы щхьэхуэу къыщIытеувыIар апхуэдэхэр мызэ-мытIэу зэрыщыIарщ икIи дяпэкIи апхуэдэ Iуэхухэм ухуэбэлэрыгъ зэрымыхъунурщ. УнафэщIым зэрыжиIамкIэ, апхуэдэ Iуэху мыщхьэпэхэм цIыхухэр зэщигъэIеину аращ, армыхъумэ узыфэм зыщыхъумэнымкIэ сэбэпынагъышхуэ къахьынукъым. Иужьрейм хуэунэтIа Iэмалхэр щыIэщи, абыхэм тетын хуейуэ аращ.

Парт хэхыныгъэхэр

Инджылыз къэралыгъуэр коронавирус узыфэм нэхъыбэ дыдэу зыщиубгъуахэм, абы гуащIэу щыпэщIэтхэм ящыщми, политикэ Iуэхухэр щызэпыуакъым.

Къэралым и лейборист партым и унафэщIыр хахащ иджыблагъэ - езыхэм я хабзэм тету, а Iуэхур мазаем и кIэ - мэлыжьыхьым и пэщIэдзэ пщIондэ екIуэкIын хуейт. Партым хэтхэм я процент 56,2-м я дзыхь ирагъэзри, а къулыкъур хуагъэфэщащ Стармер Кир.
Абы жиIащ и къулыкъум зэман къызэрымыкIуэм зэрыпэрыхьэр. Ар партым къыдыхэтхэм пщIэ къызэрыхуащIым и нэщэнэу къелъытэ, апхуэдэ дзыхьым жэуаплыныгъэшхуи зэрыпылъри зыхещIэ. Абы и лэжьэгъухэр къигъэгугъащ лъэкI къимыгъанэу и IэнатIэм зэрыпэрытынумкIэ. Зи унафэщIыр оппозицэ парту щыщыткIэ, и лэжьыгъэм гугъуехь мымащIэ зэрыщыIууэнури фIыуэ къыгуроIуэ Стармер.
«Ди Правительствэм щыуагъэхэр IэщIэкIыу, е нэгъуэщI ныкъусаныгъэхэр зэхищIыхьу тлъагъумэ, дэ ар ткIийуэ жэуапым зэретшэлIэнум яужь дитынущ», - къыхигъэщащ партым и унафэщIыщIэм.

Нобэ

Цыджанхэм я дунейпсо махуэщ. Цыджанхэм я дунейпсо конгрессу 1971 гъэм Лондон щызэхэтам къыщащтащ абы теухуа унафэмрэ а лъэпкъым и гимнымрэ и ныпымрэ.
УФ-мрэ Белоруссиемрэ я дзэ комиссариатхэм я лэжьакIуэхэм я махуэщ
1766 гъэм мафIэсыр щагъэункIыфIкIэ къагъэсэбэп пкIэлъей зэрыгъэжыр къызэрагупсысам и патент дунейм щыяпэу США-м щатащ.
1918 гъэм плъыфищу зэгуэлъ Урысей бэракъыр зэрахъуэкIащ щэкI плъыжь зэфIэзэщым къыхэщIыкIа, зи къуапэм гъубжэ, уадэ, вагъуэ хэщIыхьа ныпкIэ.
1918 гъэм Сихъу Сэфарбий и усэхэр зэрыт тхылъ къыдэкIащ.
1966 гъэм КПСС-м и ЦК-м и Секретарь нэхъыщхьэу Брежнев Леонид хахащ.
1336 гъэм къалъхуащ Азие Курытым щыщ къэрал къулыкъущIэ, дзэзешэ, Кавказым и тхыдэми лъэужьышхуэ къыхэзына Тамерлан.
1908 гъэм къалъхуащ Адыгэ Республикэм щыщ парт, совет лэжьакIуэ, Социалист Лэжьыгъэм и ЛIыхъужь Чэмокъуэ Аслъэнджэрий.
1938 гъэм къалъхуащ композитор, УФ-м гъуазджэхэмкIэ щIыхь зиIэ и лэжьакIуэ Тыкъуэ Къаплъэн.
1938 гъэм къалъхуащ дипломат, Лъэпкъ Зэкъуэтхэм я Зэгухьэныгъэм и Секретарь нэхъыщхьэу 1997 - 2006 гъэхэм щыта Аннан Кофи.
1945 гъэм къалъхуащ Адыгеймрэ УФ-мрэ я цIыхубэ сурэтыщI, АР-м и Къэрал саугъэтым и лауреат Къат Теучэж.
1955 гъэм къалъхуащ футболист цIэрыIуэ, тренер Iэзэ, СССР-м спортымкIэ щIыхь зиIэ и мастер, къэралым и чемпион, Совет Союзым и мызакъуэу, дунейм и щIыпIэ куэдми зи цIэр щыIуа Чивадзе Александр.
1957 гъэм къалъхуащ къэрал, жылагъуэ лэжьакIуэ, КъБР-м и Парламентым ЩэнхабзэмкIэ, граждан, жылагъуэ IуэхущIапIэхэм зегъэужьынымрэ цIыхубэ хъыбарегъащIэ IэнатIэхэмкIэ и комитетым хэт Пащты Борис.
1957 гъэм къалъхуащ КъБР-м и Жылагъуэ палатэм хэта Шэшэн МуIэед.
1986 гъэм къалъхуащ урысей футболист цIэрыIуэ, УФ-м спортымкIэ щIыхь зиIэ и мастер, ди къэралми дуней псоми я гъуащхьэтет нэхъыфIхэм хабжэ Акинфеев Игорь.
Дунейм и щытыкIэнур
«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Хуабэр махуэм градуси 10 - 12, жэщым градус 1 - 2 щыхъунущ.

Лъэпкъ Iущыгъэ:
И щхьэр мыжьрэ и жьэр бзаджэу.

 

Зыгъэхьэзырар ЖЬЭКIЭМЫХЪУ Маринэщ.
Поделиться:

Читать также:

29.03.2024 - 17:31 ЩIым и сыхьэт
29.03.2024 - 12:46 НОБЭ
27.03.2024 - 15:00 НОБЭ
26.03.2024 - 08:01 НОБЭ